a+b

denok daukagu ume txiki bat geure barruan


denok daukagu ume txiki bat geure barruan
baita ume txikiek ere
eta ume txiki hori
animalia baten modukoa da

— — — — -

gau batzuetan
umeari amets batzuk gaiztotu egiten zitzaizkion
ez zen sarri gertatzen
gehienetan amets atseginak izaten zituen
baina batzuetan baita amesgaizto izugarriak ere
amets horietan
egunean zehar bizitako kontu ilunak
biderkatu egiten zitzaizkion
amets horietan
beldurra ematen zionak
erakarri ere egiten zuen
hori bai bitxia


— — — — -


egun batean
esna zegoela
baso berezi baten inguruan
egin zioten berba
baso ilun eta misteriotsu bat
argi ñimiñoz josia

eta magiaz inguratua
beldurra eman zion hasieran
beldur handia
beldur horrek ordea
ametsetakoak bezala
erakarri ere egiten zuen
eta basoan barneratzea erabaki zuen

— — — — -

basora heldu zenean
argi txikiei jarraika hasi zen
ilunguneetatik ihesean
orduan sentipen bitxi bat izan zuen
basoa umetoki erraldoi bat zela
eta inguruko lurra bere ama
bere ama ikusi nahiak
eraman zuen ume txikia
inguruko ilunguneetan arakatzera
begiratzearen indarrez
ilunguneak desegin eta
argitu egin zitzaizkion
begiak argi berezi bi bilakatu
eta gau argitsura esnatu zen
hala osotu zen umea
argiaren basoan
eta orduztik aurrera
bizitzen jarraitu zuen
lehengo amesgaiztorik barik